Lára Óskarsdóttir: Enginn sem stoppaði mig

„Ég er bara rosalega ánægð með þessa niðurstöðu, ég er eins og hinir pólitíkusarnir að þegar ég tapa þá er ég ánægð," segir Lára Óskarsdóttir, sem bauð sig fram til varaformanns Sjálfstæðisflokksins á landsfundinum um helgina. Ólöf Nordal þingmaður flokksins fékk 70% atkvæða en Lára fékk rúmlega 17%.

Lára hefur aldrei gegnt trúnaðarstörfum fyrir flokkinn áður en hefur verið skráð í hann í mörg ár. „Ég kem algjörlega óþekkt þarna inn og mér finnst framboðið hjá mér sýna að þetta er hægt og við erum í opnari flokk en margir vilja halda. Það var enginn sem stoppaði mig eða setti út á þessa leið mína," segir Lára.

Aðspurð hvort hún hafi búist við að fá jafn mikinn stuðning og raun ber vitni segir Lára að hún hafi ekki haft neinar væntingar. „17,4 prósent atkvæða er frábær árangur eftir 15 mínútna ræðu. Ég sendi ekki einn tölvupóst og hringdi ekki eitt símtal," segir Lára en margir voru hissa á henni á fundinum. „Ég tók bara þá ákvörðun að senda ekkert frá mér sem er vanhugsað og ákvað því að fara bara þessa leið."

Lára segist vera sátt með Ólöfu Nordal sem varaformann flokksins. „Hún er hörku kona sem er mjög þekkt innan flokksins, en mér finnst samt 17,4% svona miðað við litla kynningu sýna að fólk vill einhverjar breytingar. Mér skyldist á fólki að það hefði viljað fá fleiri konur, eða fólk þarna fram, fólk vildi hafa val," segir Lára að lokum.