Hestadagar í Reykjavík

19. mars 2010 06:00

Óskar Bergsson skrifar hestamennsku .

Borgarstjórn Reykjavíkur hefur samþykkt að Reykjavíkurborg verði, einu sinni á ári, sérstakur vettvangur fyrir íslenska hestinn, undir nafninu Hestadagar í Reykjavík. Þessi ákvörðun eru viðbrögð Reykjavíkurborgar við skýrslu sjávarútvegs- og landbúnaðarráðuneytisins um markaðssetningu íslenska hestsins erlendis og er framlag borgarinnar til þessa markaðsátaks.

Hestadagar í Reykjavík eru ekki tengdir ákvörðun um Landsmót hestamannafélaga árið 2012, heldur er hér um að ræða árvissan viðburð sem fyrst verður haldinn í marsmánuði 2011. Með þessum viðburði geta íbúar og gestir Reykjavíkur komist í nána snertingu við íslenska hestinn sem er ný nálgun með það að markmiði að tengja saman menningu og náttúru í borgarumhverfinu.

Með Hestadögum í Reykjavík í marsmánuði er stigið skref í kynningu á íslenska hestinum í vetrarbúningi, þegar hross eru á húsi og daginn farið að lengja. Marsmánuður getur bæði verið harður vetrarmánuður og ljúfur vormánuður og við það verður miðað í öllum undirbúningi. Ástæðan fyrir því að marsmánuður er valinn er m.a annars vegna þess að á þeim tíma eru flestir með hross sín á húsi og í þjálfun. Skólarnir í borginni eru starfandi á þessum tíma og því góður tími til að kynna hestinn fyrir nemendum. Síðast en ekki síst má geta þess að marsmánuður er utan hefðbundins ferðamannatíma og því hagsmunir fyrir ferðaþjónustuna að draga til sín ferðamenn í tengslum við íslenska hestinn.

Hestadagar í Reykjavík munu glæða borgina nýju lífi innan borgarmarkanna þar sem hesturinn verður í aðalhlutverki. Á Hestadögum sjáum við fyrir okkur að hestar komi fram á stöðum sem fólk er ekki vant að sjá hross, s.s. eins og í miðborginni, við verslunarmiðstöðvar og við skóla borgarinnar, til viðbótar við sýningar og keppni á félagssvæði Fáks á Víðivöllum.

Eitt af einkennum Hestadaganna á að vera léttleiki og frjálslegt sýningarform sem á að ná til alls almennings. Keppnisgreinarnar verði hugsaðar þannig að léttleiki og frelsi íslenska gæðingsins njóti sín sem best og að áhorfandinn upplifi hughrifin af íslenskum gæðingi, teknum til kostanna í höfuðborg landsins.Reykjavíkurborg vonast til með að eiga gott samstarf við hagsmunaaðila í hestamennskunni sem sjá tækifæri í því að markaðsetja starfsemi sína í höfuðborginni með tilkomu Hestadaga í Reykjavík.

Höfundur er formaður borgarráðs.