Alexander frábær í góðum sigri

Alexander Petersson var fljótur að jafna sig á meiðslunum sem hann hlaut í leik Íslands og Austurríkis um síðustu viku því hann fór mikinn er Füchse Berlin vann Gummersbach á útivelli í þýsku úrvalsdeildinni í handbolta í dag.

Alexander var næstmakahæstur í liði Berlínar með sjö mörk en þjálfari Füchse Berlin er Dagur Sigurðsson.

Rhein-Neckar Löwen, lið Guðmundar Guðmundssonar, vann Grosswallstadt, 31-23. Ólafur Stefánsson skoraði þrjú mörk fyrir Löwen og Róbert Gunnarsson eitt. Guðjón Valur Sigurðsson er sem fyrr frá vegna meiðsla.

Sverre Andreas Jakobsson lék í vörn Grosswallstadt en skoraði ekki í leiknum.

Kári Kristján Kristjánsson skoraði sex mörk fyrir Wetzlar sem vann Ahlen-Hamm, 30-27. Einar Hólmgeirsson er enn frá vegna meiðsla í liði Ahlen-Hamm.

Þórir Ólafsson, sem missti af leiknum gegn Austurríki vegna meiðsla, skoraði fjögur mörk fyrir Lübbecke sem vann Rheinland, 33-22. Sigurbergur Sveinsson skoraði fimm mörk fyrir Rheinland en Árni Þór Sigtryggsson ekkert.

Það komu þó engir Íslendingar við sögu í stórslag deildarinnar í dag er Hamburg vann öruggan sigur á Flensburg á heimavelli, 32-24.

Löwen komst á topp deildarinnar með sigrinum í dag, um stundarsakir að minnsta kosti þar sem liðið hefur leikið einum leik meira en flest önnur lið í deildinni.

Löwen er með nítján stig, Füchse Berlin í fjórða sæti með sautján stig, Grosswallstadt í áttunda með tólf, Lübbecke í tólfta með sjö, Wetzlar í fjórtánda með fimm, Rheinland í sextánda með fjögur og Ahlen-Hamm í sautjánda með eitt stig.



Úrslit dagsins:

Lübbecke - Rheinland 33-22

Gummersbach - Füchse Berlin 32-34

Ahlen-Hamm - Wetzlar 27-30

Rhein-Neckar Löwen - Grosswallstadt 31-23

Hamburg - Flensburg 32-24