Tíðin ágæt fyrir fjárvana frumkvöðla

„Það er fyrst nú eftir hrunið að ég tek eftir því að áhugi fjárfesta á sprotafyrirtækjum er að aukast. Þau leituðu eftir svo lágum upphæðum áður að fáir litu við þeim," segir Eyþór Ívar Jónsson, framkvæmdastjóri Klaks - nýsköpunarmiðstöðvar atvinnulífsins, sem blæs til fjárfestaþings undir merkjum Seed Forum á föstudag.

Þetta er ellefta fjárfestaþing Seed Forum þar sem frumkvöðlar kynna fyrirtæki sín og hugmyndir fyrir fjárfestum. Þing sem þetta er haldið tvisvar á ári, í apríl og október. Á þinginu nú koma fram fulltrúar sjö fyrirtækja, fimm íslenskra og tveggja norskra. Þau eru flest eins til tveggja ára þótt eldri fyrirtæki leynist á milli. Belgingur er yngsta sprotafyrirtækið, um eins árs. Það þróar nákvæmari veðurspár en sést hafa. Rannsóknarvinna hefur staðið yfir lengur.

Eyþór segir nýsköpun hafa verið setta í salt hér í allt að sex ár og því vanti sprotafyrirtæki á vaxtarstigi. Sú þróun skrifast á bankana, sem sugu til sín mikið af fólki fyrir hrun og almennt hagstæðari fjárfestingarkosti í öðru en áhættusömum kaupum í sprotafyrirtækjum. Nú horfir til betri vegar, að mati Eyþórs. Hann bendir á að fjárfestingarkostir séu færri nú en áður og fjármagn þurfi að leita í annan farveg. Þá hafa stjórnvöld og opinberar stofnanir stutt mjög við nýsköpun eftir bankahrunið, svo sem með skattalegum ívilnunum. Hann segir aðgengi að fjármagni hafa skánað strax í fyrrahaust og bendir á að eitt fyrirtækjanna sem kynnt var á þinginu í október í fyrra hafi landað samningi yfir kvöldverði síðar um kvöldið. Á meðal kunnra sprotafyrirtækja sem hafa farið á flug eftir fjárfestakynningu Seed Forum eru tölvuleikjafyrirtækin CCP og Gogogic auk tískuvörufyrirtækisins E-Label og tæknifyrirtækisins Fjölblendis.