Sex drukknir undir stýri og þrír dópaðir

Sex ökumenn voru teknir fyrir ölvunarakstur á höfuðborgarsvæðinu um helgina. Í tilkynningu frá lögreglunni segir að tveir hafi verið stöðvaðir í Reykjavík og Kópavogi og einn í Hafnarfirði og Garðabæ. Þrír voru teknir á laugardag og jafnmargir á sunnudag.

„Þetta voru fjórir karlar, 17 -39 ára, og tvær konur, 17 og 40 ára. Einn þessara ökumanna hafði þegar verið sviptur ökuleyfi og annar hefur aldrei öðlast ökuréttindi," segir einnig.

Þá voru þrír ökumenn, allt karlar, teknir á höfuðborgarsvæðinu um helgina fyrir að aka undir áhrifum fíkniefna. Tveir voru stöðvaðir í Reykjavík og einn í Kópavogi. „Annar þeirra sem var tekinn í Reykjavík lét stöðvunarmerki lögreglu sig engu skipta en honum var veitt eftirför úr Garðabæ í Hafnarfjörð og þaðan áfram í Kópavog uns lögreglumönnum tókst að þvinga bíl hans út fyrir Reykjanesbraut á móts við Mjóddina. Ökumaðurinn, sem er tæplega fertugur, hafði þegar verið sviptur ökuleyfi," segir ennfremur.