Sláturtíðað hefjast

Dagana 29. september til 3. október halda Samtök listrænt ágengra tónsmiða umhverfis Reykjavík (S.L.Á.T.U.R.) hina árlegu tónlistarhátíð, Sláturtíð, í annað sinn. Um er að ræða hátíð fulla af ágengri, tilraunakenndri og uppátækjasamri tónlist sem margir bendla við framúrstefnu, hliðarstefnu eða jaðarstefnu.

Á hátíðinni má heyra tónverk eftir ýmsa meðlimi samtakanna sem og sérvalin verk eftir erlend ágeng tónskáld. Á hátíðinni verða margir framúrskarandi flytjendur, þar á meðal finnski tónlistarhópurinn Defun Ensemble sem sérhæfir sig í að flytja tónlist sem blandar hefðbundnum hljóðfærum við tölvutónlist.

Einnig koma fram Skmendanikka sem spilar á sérsmíðuð hljóðfæri og hópurinn Fengjastrútur sem er sveigjanlegur og fjölþreifinn tónlistarhópur sem sérhæfir sig í að víkka fyrirfram gefnar hugmyndir um tónlistarflutning. Nánari upplýsingar má finna á Slátur.is.