Milljarða samningur við Seðlabanka Kína

Seðlabankar Íslands og Kína kynna í dag gjaldeyrisskiptasamning sín á milli upp á nokkra tugi milljarða króna, samkvæmt heimildum blaðsins.

Frá því var greint í gær að Már Guðmundsson seðlabankastjóri og Hu Xiaolian, aðstoðarseðlabankastjóri Kína, myndu skrifa undir samning bankanna í utanríkisráðuneytinu laust eftir klukkan níu árdegis.

Markmið samningsins mun vera að styrkja gjaldeyrisforða Seðlabanka Íslands, en samningar sem þessi ganga út á að erlendur banki lætur af hendi gjaldeyri gegn greiðslu í krónum. Seðlabanki Íslands hefur ekki gert gjaldeyrisskiptasamning við erlendan seðlabanka frá því fyrir hrun. Síðast var slíkur samningur gerður við seðlabanka Noregs, Danmerkur og Svíþjóðar í maí 2008. Þeir samningar voru alls upp á 1,5 milljarða evra, eða 500 milljónir evra frá hverjum banka.

Haustið 2008 gerði Seðlabanki Bandaríkjanna svo viðlíka gjaldeyrisskiptasamninga við norrænu bankana en ekki þann íslenska, þó að eftir því væri leitað.

Kínverjar eru sagðir hafa verið jákvæðir í garð Íslendinga frá hruni og meðal annars stutt landið á vettvangi Alþjóðagjaldeyrissjóðsins (AGS). Með samningi við Seðlabanka Íslands nú vilji þeir sýna stuðning sinn í verki.

Gylfi Magnússon viðskiptaráðherra segir að samningurinn bæti aðgengi Seðlabankans, og íslenska hagkerfisins í heild, að gjaldeyri, sem leitað hafi verið eftir að undanförnu. Samningurinn liðki jafnframt fyrir viðskiptum við Kínverja. Gylfi segir hægt að túlka samninginn sem traustsyfirlýsingu frá stórveldinu Kína. „Já, ég lít svo á að þetta endurspegli mat þeirra á stöðu mála hér. Það mat er augljóslega að þeir treysta sér í svona samningsgerð."

Samningarnir eru undirritaðir í tilefni af komu He Guoqiang, flokksritara í miðstjórn kínverska kommúnistaflokksins, hingað til lands. Hann mun funda með forseta Íslands, forsætis- og utanríkisráðherra.

Eins mun hann undirrita viljayfirlýsingu við Landsvirkjun um þátttöku í útboðum um virkjanir á Íslandi og samning við Enex Kína um áframhaldandi samstarf um hitaveitur í Kína.