Enn einn sölumaður siglir í bæinn

Það var í þessum skrifuðu orðum að upplýsa á RUV að Rússinn Alex Jurshevski hafi reynt að ráða sig í starf hjá hinu opinbera. Sjálfur segist hann vera sérfræðingur í „skuldastjórnun". Hið opinbera taldi ekki þarft að bæta einum grilljóna á mánuði manni við jötuna við þá iðju.

Alex þessi talaði sig þá inn á viðtal í Silfri Egils þar sem hann tjáði stjórnenda þáttarins að allt færi til andskotans á Íslandi ef ekki væri farið að ráðum hans. Mætti kannski segja að viðtalið í Silfri Egils hafi verið einhverskonar postmodernísk endurhverf atvinnuumsókn hjá Alex.

Þeim sem þjást af illvígri þjóðremu í bloggheimum þótti sem Alex væri manna af himnum. Þarna var loksins kominn Rússi með rök fyrir því afhverju við sem þjóð ættum að segja „fokkaðu þér" við umheiminn. Þetta væri allt spurning um „skuldastjórnun" og Alex væri jú sérfræðingur í slíku.

Alex láðist að vísu að geta að það sem kallast „skuldastjórnun" í hans huga er í raun að lýsa því yfir að við séum gjaldþrota sem þjóð. Það er því rétt hjá Gylfa Magnússyni efnahags- og viðskiptaráðherra að segja að það sem Alex hefði fram að færa væri „algert rugl".

Því miður hefur Egill Helgason, stjórnandi Silfurs Egils, fallið í þá gryfju að verja Alex enda var hann jú stjarnan í síðasta þætti Egils. Eftir allt bloggið um íslensk efnahagsmál ætti Agli að vera það fullkunnugt að áætlun og lán í gegnum Alþjóðagjaldeyrissjóðinn (AGS) eru ekki til að auka við skuldir landsins. Áætlun miðar að því að létta á skuldabyrðinni.

Það liggur fyrir að fyrir lok næsta árs þarf ríkissjóður að greiða 1.3 milljarða evra af erlendum lánum, eitthvað yfir 200 milljarða kr. Ríkissjóður á ekki fé til að greiða þetta upp nema tæma gjaldeyrisvarasjóðinn. Þetta þarf að endurfjármagna. Og hverjir eru möguleikarnir á því?

Með samstarfi við AGS er hægt að endurfjármagna þessa upphæð á einum bestu vöxtum sem eru í boði fyrir Ísland í dag, þökk sé aðkomu Norðurlandanna. Hinn möguleikinn er að vogunarsjóðir eða álíka áhættufjárfestar veiti lán á hærri vöxtum sem þar að auki yrðu með vel yfir 4% álagi því þeir myndu þurfa að taka út skuldatryggingar á sínum lánum.

Það er hryggilegra en tárum taki að í þessari stöðu eru einhverjir Vinstri grænir sem telja að brottför AGS af landinu sé einhver áfangasigur í baráttunni við heimskapitalismann. Þetta fólk ætti heldur að byrja að berjast fyrir framtíð eigin þjóðar.