Þögn skilanefndar Landsbankans orðin ærandi

Nú þegar þjóðin horfir upp á Kaupþingstoppa í klefunum á Litla Hrauni og Glitnistoppa um það bil að sameinast þeim er þögn skilanefndar Landsbankans orðin ærandi.

Það liggur fyrir að skilanefnd Kaupþings hefur verið dugleg við að vísa öllum hugsanlegum glæpamálum sem upp hafa komið í störfum hennar til annaðhvort Fjármálaeftirlitsins eða sérstaks saksóknara.

Skilanefnd Glitnis fór þá leið að ráða hið virta rannsóknarfyrirtæki Kroll til að rannsaka hin meintu glæpamál í Glitni. Fyrstu niðurstöður liggja nú fyrir og þjóðin hefur verið upplýst um þau undanfarna tvo daga.

Frá skilanefnd Landsbankans heyrist ekki boffs af einhverjum ástæðum. Nefndarmenn þar hafa að vísu komið þeim skilaboðum á framfæri að þeir séu að bíða eftir einhverri skýrslu frá endurskoðendunum Deloitte um málið. Sú skýrsla liggi fyrir eftir einhverjar vikur eða mánuði. Það fylgir síðan sögunni að skilanefndarmenn hafi ekki tekið ákvörðun um hvort efni skýrslunnar verði birt eða ekki.

Það liggur við að maður spyrji sig hvort skilanefndarmenn Landsbankans séu á lyfjum eða ekki. Þessir menn verða að gera sér grein fyrir því að þrotabú Landsbankans er eign þjóðarinnar öfugt við hin þrotabúin tvö sem eru að mestu í eigu erlendra kröfuhafa.

Það hlýtur bráðum að koma sú krafa fram til íslenskra stjórnvalda að þau krefjist þess að skilanefnd Landsbankans hysji upp um sig buxurnar eða taki pokann sinn.

Það skiptir nefnilega íslensku þjóðinna töluverðu máli ef eitthvað misjafnt hefur verið upp á teningnum í starfsemi Landsbankans fyrir hrunið 2008. Icesave-reikningurinn sem þjóðin stendur frammi fyrir var skapaður í Landsbankanum en ekki Kaupþingi eða Glitni.

Og ekki gleyma einu. Það sem næst í kassann úr dómsmálum gegn stjórnendum Kaupþings eða Glitnis fer að mestu í vasa erlendra kröfuhafa. Það sem næst úr dómsmálum gegn stjórnendum Landsbankans fer í ríkissjóð.