Sigrún Pálína: Karl og Hjálmar reyndu að þagga niður í mér

Sigrún Pálína Ingvarsdóttir segir að eftir misheppnaðar sáttatilraunir við

Ólaf Skúlason, þáverandi biskup, hafi Karl Sigurbjörnsson, núverandi biskup, og Hjálmar Jónsson, núverandi Dómkirkjuprestur, reynt að þagga niður í henni. Karl hafi meðal annars vísað til þess að hún hafi ekki gert sjúkri móður sinni það að halda málinu til streitu. Sjálfur segist Karl ekki hafa tekið þátt í að beita Sigrúnu óeðlilegum þrýstingi til að fá hana til að falla frá ásökunum sínum.

Sigrún var ein þriggja kvenna sem steig fram 1996 ári áður en Ólafur Skúlason sagði af sér biskupsembætti og greindi frá því að hann hafði áreitt sig kynferðislega.

Í viðtali við DV í dag segist Sigrún hafa ásamt eiginmanni sínum hitt Hjálmar og Karl árið 1996. Þeir hafi virst reiðbúnir til þess að hjálpa og segir Sigrún að það hafi verið mikill léttir. Hún hafi farið fram á að Ólafur bæði hana opinberlega afsökunar en því hafi hann neitað. „Ég fann að því oftar sem þeir töluðu við Ólaf því niðurdregnari urðu þeir."



Breytti yfirlýsingunni

Sigrún hitti Karl og Hjálmar aftur tveimur dögum síðar. Hún segir að þau hafi komist að þeirri niðurstöðu að réttast væri að senda út yfirlýsingu. Hún hafi fallist á að draga mál sitt til baka í fjölmiðilum en að hún drægi sannleikann ekki til baka. Sigrún segir að yfirlýsingin hafi verið handskrifuð og að Karl hafi farið með hana fram til þess að prenta.

„Þegar hann kom til baka var hún eins að öllu leiti nema því að hann hafði strokað út þessa setningu um að ég drægi sannleikann ekki til baka, sem var algjört lykilatriði. Mér brá þegar ég sá það. Ég horfði á þá og sagði að þetta gæti ég aldrei skrifað undir," segir í Sigrún í DV.



„Hvað með móður þína?"

Sigrún segist hafa áttað sig á því að annað hvort hafi Karl og Hjálmar gefist upp fyrir Ólafi eða þá að þeir hafi aldrei ætlað að aðstoða hana.

„Ég stóð upp og kvaddi. Þegar ég var að fara spurði Hjálmar hvort ég gæti ekki hætt þessu fyrir börnin mín. Ég sagði: „Nei, ég get ekki hætt þessu fyrir börnin mín því þau vilja að ég segi sannleikann." Þá sagði Karl: „Hvað með móður þína? Getur þú ekki hætt þessu fyrir móður þína sem er sjúk?" Mamma var veik á þessum tíma. Þegar hann sagði þetta brást eitthvað innra með mér og ég sá Karl í nýju ljósi. Karl birtist mér sem einhver allt annar maður," segir Sigrún og bætir við að hún hafi farið af fundinum niðurbrotin af sársauka og sorg.

Menn tóku afstöðu með Ólafi eða Sigrúnu

Karl sendi frá sér yfirlýsingu í gær vegna aðkomu hans að málinu. Þar segir Karl að hafa verði í huga að Sigrún hafi kært Ólaf til saksóknara sem ekki hafi talið efni til að birta ákæru í málinu. Innan kirkjunnar hafi menn skiptst í flokka og tekið afstöðu með Ólafi eða Sigrúnu. Þá segir Karl að almenningsálitið hafi kveðið upp sinn dóm og að Ólafur hafi látið af embætti.

„Ég vísa því algjörlega á bug að hafa gengið erinda þeirra sem vildu þagga niður málið," segir Karl.