Mikill verðmunur milli apóteka á lausasölulyfjum

Verðmunur á lausasölulyfjum í apótekum höfuðborgarsvæðisins er allt að 50 prósent. Þetta kemur fram í könnun sem Neytendastofa gerði á verði nokkurra lausasölulyfja. Könnunin var gerð á tímabilinu 26. febrúar - 10. mars s.l. þar sem borið var saman verð á tíu algengum lausasölulyfjum í 31 apóteki á höfuðborgarsvæðinu.

Algengur verðmunur á vörunum, þar sem þær voru ódýrastar og þar sem þær voru dýrastar, var um 30% en mestur var hann tæp 50%. Flestar vörur voru ódýrastar í Garðsapóteki en flestar voru þær dýrastar í Laugarnesapóteki.

Á sama tíma gerði Neytendastofa skoðun á ástandi verðmerkinga í apótekum á sama tíma og verðkönnunin var gerð, sem leiddi í ljós að einungis níu apótek höfðu lausasölulyf verðmerkt. „Nauðsynlegt er að vörur séu vel verðmerktar svo neytendur geti borið saman verð þeirra á milli apóteka og út frá því tekið ákvörðun um hvar þeir vilja versla. Því eins og niðurstöður þessarar könnunar sýna getur verðmunurinn verið töluverður," segir í tilkynningu frá Neytendastofu.