Síminn vill nánari útfærslu á internetskatti

STEF, samtök tónskálda og eigenda flutningsréttar, vilja taka upp sérstakt gjald á internetnotkun til að milda fjárhagslegt högg sitt vegna ólöglegs niðurhals. Talsmaður Símans segir fyrirtækið ekki slá hugmyndina út af borðinu.

STEF hefur lengi haft horn í síðu ólöglegs niðurhals á veraldarvefnum þar sem hlutverk samtakanna er meðal annars að gæta hagsmuna félagsmanna sinna. Nú vilja samtökin leggja sérstakt gjald á nettengingar. Gjöldin myndu gefa notendum aðgang að tónlist á netinu með löglegum hætti og myndu gjöldin renna í sameiginlegan sjóð sem yrði síðan útdeilt til höfundarréttarhafa.

Hugmyndirnar voru kynntar á fundi sem haldinn var í lok síðasta mánaðar. Þar voru viðstaddir fulltrúar þeirra sem koma að útgáfu og dreifingu tónlistar, höfundarrétthafa og fjarskiptafyrirtækja, að því er fram kemur í Fréttablaðinu í dag. Hugmyndin gengur út á hóflegt gjald yrði lagt á nettengingar hjá fjarskiptafyrirtækjum sem notendum bæri að greiða og myndu þeir þar með fá heimild til að hala niður tónlist á lögmætan hátt á netinu í gegnum sérstakt vefsvæði.

Margrét Stefánsdóttir, talsmaður Símans, segir að útfæra verði hugmyndina nánar áður en fyrirtækið geti tekið afstöðu til hennar. „Við hjá Símanum höfum tekið undir sjónarmið listamanna að það gengur náttúrulega ekki að tónlistarmenn fái ekki greitt fyrir höfundaverk sín. Okkur finnst líka jákvætt að listamenn eigi frumkvæði að þessari vinnu og komi fram með þessa hugmynd. Hugmyndin er hins vegar það skammt á veg komin og því er algjörlega ótímabært hvort og hvernig þetta muni hafa áhrif á verðskrár," segir Margrét.

Ekki náðist í Eirík Tómasson, framkvæmdastjóra STEFs í morgun.