Búa þarf í haginnfyrir fyrirtækin

„Við verðum að búa í haginn fyrir fjárfesta og bjóða upp á góðar aðstæður, í það minnsta sambærilegar og í nágrannalöndum. Þanni glæðum við atvinnustarfsemi sem er undirstaða efnahagslífsins,“ segir Finnur Oddsson, framkvæmdastjóri Viðskiptaráðs Íslands.

Finnur segir ekki hafa tekist vel við efnahagsstjórn síðustu árin. Efnahagslífið hafi um langt árabil einkennst af sveiflum, sem hafi gert stjórnendum fyrirtækja erfitt um vik. Óvissa spillir fyrirÍ kjölfar efnahagshrunsins hafi ekki betra tekið við: „Stjórnvaldsaðgerðir hafa valdið því að traust á þá sem halda í stjórnartauma hefur rýrnað. Það fælir á brott fyrirtæki sem hafa kost á að fara annað og kemur í veg fyrir að önnur leiti hófanna hér,“ segir Finnur og bætir við að ýmsar breytingar á skattkerfinu upp á síðkastið og aðrar sem fyrirhugaðar eru séu ekki til þess fallnar að halda í fyrirtæki eða laða önnur hingað til lands.

„Það verður að koma í veg fyrir að forsvarsmenn fyrirtækja sem geta farið annað hugleiði flutning þeirra. Í því sambandi ætti að horfa heildstætt á umhverfi fyrirtækjanna. Í dag eru margar brotalamir í kerfinu – ýmis atriði sem þegar á heildina litið gera rekstrarumhverfið fráhrindandi. Þær bætast við óróleikann í efnahagslífinu og skaða samkeppnishæfni hagkerfisins.“

Finnur leggur ríka áherslu á nauðsyn þess að tryggja hagfellt umhverfi til reksturs fyrirtækja í alþjóðlegri starfsemi. Öðru fremur þurfi að draga úr pólitískum óstöðugleika og auka traust á stjórnvöld og vilja þeirra til að styðja við atvinnulífið. Einnig þurfi að gæta að afleiðingum örra og lítt grundaðra breytinga á skattkerfinu. Slíkt umhverfi sé fráhrindandi. „Stjórnendur fyrirtækja huga að því hvort hag þeirra fyrirtækja sé betur borgið hér en annars staðar. Ef það er ekki raunin þá ýtir það undir líkur á að starfsemi fyrirtækja færist út fyrir landsteinana, sem þýðir að verðmætasköpun og störf fylgja og skatttekjur tapast. Í því viðkvæma ástandi sem við búum við núna munar um hvert fyrirtæki,“ segir Finnur og hefur sérstakar áhyggjur af fyrirtækjum innan hugverkageirans, sem eru hvað hreyfanlegust. Óljós framtíðFinnur segir mikilvægt að stjórnvöld geri upp við sig hvers kyns atvinnustarfsemi verði hér í framtíðinni. Hann er fylgjandi hugmyndum sem fjallað hefur verið um upp á síðkastið og fela í sér hvatningu fyrir fólk á atvinnuleysisskrá að afla sér tæknimenntunar. Það rími við yfirlýstan stuðning stjórnvalda við uppbyggingu sprotastarfsemi.

„Hugverkaiðnaðurinn byggir á hugmyndum og þekkingu, sem ekki er bundin við landamæri. Í þessum geira í dag eru á milli átta til níu þúsund störf og þörf fyrir eitt til tvö þúsund manns til viðbótar á hverju ári,“ segir Finnur. „Við þurfum á fleirum að halda til að standa undir vexti þessa geira,“ bætir Finnur við og og víkur að mikilvægi menntakerfisins sem anni ekki þörfinni í dag. „Það þarf vissulega að skera niður í opinberum útgjöldum, en um leið þarf að huga að undirstöðum efnahagslegrar endurreisnar. Þetta er umhugsunarefni því háskólamenntun, sérstaklega á sviði tæknigreina, telst til grunnstoða hugverkaiðnaðarins þar sem sóknarfæri okkar liggja ljóslega,“ segir Finnur.