Sigurður Ari og félagar í Elverum náðu bronsinu

Sigurður Ari Stefánsson og félagar í Elverum urðu í 3. sæti í úrslitakeppni norsku úrvalsdeildarinnar í handbolta eftir 27-26 sigur á Øyestad í bronsleiknum í dag. Elverum tapaði 24-25 fyrir Runar í undanúrslitaleiknum í gær en úrslitahelgin fór öll fram í Drammen.

Sigurður Ari skoraði 4 mörk úr 9 skotum í bronsleiknum og var næstmarkahæstur í liði Elverum. Elverum var 14-12 undir í hálfleik en tryggði sér síðan sigurinn með því að skora tvö síðustu mörkin í leiknum.

Sigurður Ari skoraði 3 mörk úr 9 skotum í undanúrslitaleiknum á móti Runar en Runar spilar til úrslita á móti Fyllingen. Sigurður Ari var alls með 19 mörk í 4 leikjum í allri úrslitakeppninni eða 4,8 mörk að meðaltali í leik.