Björninn felldur þrátt fyrir sérhannað björgunarbúr

Búrið sem nota átti við síðustu björgunartilraun þegar ísbjörn gekk á land nærri Skagafirði er enn á landinu samkvæmt Umhverfisstofnun. Þá náðist ekki að fanga björninn lifandi. Búrið hefur því ekki verið notað. Ákveðið hefur verið að fella björninn í Þistilfirði þar sem ekki séu uppi ákjósanlegar aðstæður til þess að bjarga honum.

Umhverfisstofnun fylgir viðbragðsáætlun vegna landgöngunnar og er í sambandi við yfirvöld í Þórshöfn. Tvær skyttur og lögregluþjónn fylgja ísbirninum eftir. Ísbjörnin sást á Sævarslandi í Þistilfirði upp úr klukkan eitt í dag.

Samkvæmt tilkynningu frá Umhverfisstofnun þá barst tilkynning um að hvítabjörn hafi gengið á land í Þistilfirði í dag. Umhverfisstofnun vinnur nú að viðbrögðum í samráði við lögreglu og önnur yfirvöld. Mat lögreglu á aðstæðum eru að nauðsynlegt sé að fella björninn við fyrsta tækifæri og tekur Umhverfisstofnun undir það.

Niðurstaða starfshóps um viðbrögð við landgöngu hvítabjarna sem skipuð var í kjölfar landgöngu tveggja hvítabjarna árið 2008 var fella beri hvítabirni sem ganga á land. Samkvæmt Umhverfisstofnun eru fyrir því þrenn meginrök, í fyrsta lagi öryggissjónarmið, í öðru lagi stofnstærðarrök og í þriðja lagi kostnaður við björgunaraðgerðir.

Til þess að reyna björgun þurfa að vera ákjósanlegar aðstæður, s.s. að fólki standi ekki hætta af, skyggni sé gott og tryggt sé að dýrið sleppi ekki út í vatn eða sjó. Aðstæður í Þistilfirði eru ekki ákjósanlegar til þess að reyna björgun.

Eftirlits- og björgunarflugvél Landhelgisgæslunnar, TF-Sif, tekur þátt í leitinni en vélin var við hefðbundið eftir á miðunum undan Norðausturlandi. Hún nálgast nú svæðið þar sem talið er að ísbjörninn haldi sig. Flugvélin er búin afar góðum eftirlitsbúnaði.