Vill þrjá saksóknara - Einn um hvern banka

Eva Joly sagði í Kastljósi fyrr í kvöld að hún vilji að í stað eins sérstaks saksóknara verði þeir þrír. Hver og einn kæmi þá til með að rannsaka mál sem koma að hverjum stóru viðskiptabankanna fyrir sig.

Í þættinum sagði Eva jafnframt að Valtýr Sigurðsson ætti að víkja vegna tengsla sinna en sonur Valtýs, Sigurður, er annar tveggja forstjóra Exista.

Eva sagði að hún kæmi ekki að gagni fyrir Íslendinga ef ekki væri farið að ráðum hennar. Hún sagði jafnframt að íslensk stjórnvöld þyrftu að setja talsverða peninga í rannsóknina ef hún ætti að bera árangur. Rannsakendur yrðu að fá borgað.