Barnaníðskæra gegn hrotta látin niður falla

Hrottinn sem var dæmdur í átta ára fangelsi fyrir að ganga ítrekað í skrokk á konu sinni og láta ellefu menn hafa samræði við hana gegn hennar vilja, var einnig kærður fyrir að misnota barnunga dóttur sína. Í framburði fyrrum sambýliskonu hans, sem varð fyrir ofbeldinu, kom fram að hana hafi grunað að maðurinn hefði nauðgað eigin dóttur.

Hún tilkynnti atvikið til lögreglunnar. Orðrétt segir í dómnum: Umrætt sinn hafi dóttir ákærða gist hjá þeim og sofið í sama rúmi og ákærði og A [sambýliskona mannsins]. Er A hafi farið að sofa hafi hún verið undir áhrifum áfengis. Er A hafi vaknað um morguninn hafi hún orðið vör við blóð í rúminu, sem ekki hafi stafað frá henni. Hafi hún einfaldlega ekki þorað öðru en að gera viðvart um tilvikið

Þegar haft var samband við lögmann mannsins kom í ljós að maðurinn var kærður fyrir að hafa misnotað dóttur sína en læknaskoðun hafi leitt í ljós að grunsemdirnar væru ekki á rökum reistar.

Var málið látið niður falla í kjölfarið.

Maðurinn, sem er 37 ára gamall var dæmdur í átta ára fangelsi fyrir óhugnanlegt ofbeldi gegn sambýliskonu sinni yfir tveggja ára tímabil. Í dómsorði segir að gjörðir hans eigi sér engar hliðstæður í íslenskri réttarsögu.

Maðurinn, sem er menntaður stjórnmálafræðingur, hyggst áfrýja dómnum en hann er sá þyngsti sinnar tegundar sem fallið hefur á Íslandi.

Lögmaður hans, Hilmar Ingimundarson, telur að það sé mögulegt að aðilar sem sóttu málið séu vanhæfir. Hann bendir á að eiginkona ríkissaksóknara hafi komið að rannsókn kynferðisbrotadeildar að málinu. Þá er fulltrúi ríkissaksóknara sem sótti máli dóttir yfirmanns kynferðisbrotadeildarinnar á höfuðborgarsvæðinu.