Pólskt þjófagengi í gæsluvarðhaldi

Þrír pólverjar sem úrskurðaðir voru í gæsluvarðhald fyrir helgi eru taldir tilheyra skipulögðu gegni innbrotsþjófa sem grunað er um að hafa brotist inn í hundruð heimila síðustu vikur og mánuði. Lögreglan rannskar hvort þýfinu hafi verið smyglað úr landi.

Eins og við höfum áður sagt frá hefur mikil innbrotaalda skollið á höfuðborgarsvæðinu, en meira en 250 innbrot eru framin í hverjum mánuði sem er mikil aukning frá fyrri árum.

Grunur leikur á að stór hluti þessara innbrota séu framin af skipulögðum hóp pólskra ríkisborgara sem búsettir eru hér á landi. Samkvæmt upplýsingum fréttastofu hefur Lögreglan smám saman verið að kortleggja þennan hóp en þrír þeirra voru svo handteknir við innbrot í Reykjavík á miðvikudaginn og úrskurðaðir í gæsluvarðhald degi síðar.

Sama dag voru karl og kona, sem einnig eru pólverjar, handtekin, en þau eru grunuð um að vinna með innbrotsþjófunum við að koma þýfi í verð hjá skartgripasölum.

Lögregla verst frétta af málinu og segir það enn í rannsókn. Á meðal þess sem rannsakað verður er hvort fleiri tengjast þessum skipulagða hóp innbrotsþjófa, hversu mörg innbrot hópurinn hefur framið undafarna mánuði en grunur leikur á að þau skipti tugum ef ekki hundruðum, og að lokum hvort þýfi hafi verið smyglað úr landi.

Á meðal þeirra sem hafa orðið fyrir barðinu á genginu er einn af prestum kaþólsku þirkjunnar á íslandi en þjófarnir rændu af honum meira 100 þúsund krónum í reiðufé.