Nær enginn öruggur gegn óværunum

„Það hefur orðið algjör sprenging í vel gerðum spilliforritum. Óprúttnir aðilar úti í heimi eru farnir að ráða til sín hæfileikaríkt fólk sem getur búið til óværur og spilliforrit sem laumast nær óhindrað inn í tölvur. Þeir selja aðgang að þeim til hæstbjóðanda í tiltekinn tíma og geta þeir nálgast viðkvæmar upplýsingar,“ segir Kristinn Guðjónsson, sérfræðingur hjá upplýsingatæknifyrirtækinu Skyggni.

Kristinn segir tölvubrot og innbrot í tölvukerfi hafa stóraukist upp á síðkastið og séu tölvuþrjótarnir orðnir mjög færir. Hann segir það liðna tíð að unglingar með góða tölvuþekkingu hafi aflað sér virðingar með því að búa til vírusa og spilliforrit.

Eftir að harðsvíruð glæpasamtök, svo sem í Brasilíu, Kína og Rússlandi, hafi komist að því að hafa megi fé af fólki með óværum af öllu tagi hafi orðið sprenging í geiranum. Hann vísar til þess að frá 1986 til 2008 hafi tíu milljónir óværa verið greindar. Þær eru nú tuttugu milljónir talsins, sem er tvöföldum á tólf mánaða tímabili. Þá hafi árásum óværa fjölgað úr hundrað á degi hverjum í á milli fimmtán til tuttugu þúsund nú.

Friðrik Skúlason, stofnandi og framkvæmdastjóri veirubanafyrirtækis undir sama nafni og höfundur að veiruvarnarforritinu Frisk, tekur undir þetta.

Hann segir vírusa nær horfna. Hins vegar hafi ýmiss konar fjárkúgunarforrit, trójuhestar og bakdyr tekið við. Síðasttalda óværan opnar óviðkomandi aðgang inn í tölvur og getur sá nálgast nær hvaða upplýsingar sem hann vill. „Helsti vandinn í dag eru forrit sem segja tölvur sýktar og gefa sig út fyrir að vera hreinsibúnaður. Þetta er einnota búnaður sem gerir ekki neitt en notendur greiða fyrir,“ segir Friðrik og bætir við að gífurlegir fjármunir séu í spilinu. Hann nefnir að eitt óværufyrirtæki hafi keypt leitarorð þekkts veirubanafyrirtækis hjá netleitarfyrirtækinu Google og greitt á bilinu sex til níu hundruð þúsund dali fyrir. Það jafngildir rúmum hundrað milljónum íslenskra króna. Þegar netverjar hafi leitað að tilteknu forriti hafi netsíða komið upp þar sem reynt hafi verið að pranga inn á fólk vita gagnslausum hugbúnaði.

jonab@frettabladid.is