Þrílitu bindin seldust upp

Krabbameinsfélag Íslands stóð í annað sinn fyrir átakinu „Karlmenn og krabbamein" í mars. Átakið vakti mikla athygli en því var ætlað að vekja karlmenn til vitundar um krabbamein og þátt heilbrigðs lífsstíls í forvörnum gegn þessum erfiða sjúkdómi. Þrílit bindi sem seld voru til styrktar átaksins í verslunum Herragarðsins eru nú uppseld. Ágóðinn af sölunni var ríflega 1,2 milljónir króna en alls seldust 279 bindi.

Litirnir þrír, blár, hvítur og fjólublár, tákna þrjú algengustu krabbamein hjá körlum; blöðruhálskirtils-, lungna- og ristilkrabbamein.

„Við erum stoltir af að styðja við átak á borð við þetta, en mikið hefur skort á umræðu um karla og krabbamein," segir Hákon Hákonarson hjá Herragarðinum. „Salan gekk mjög vel og bindin seldust upp hér í verslun okkar í Kringlunni."

„Rannsóknir sýna að hægt er að koma í veg fyrir allt að eitt af hverjum þremur krabbameinstilfellum með því að borða hollari mat, stunda líkamsrækt, stilla drykkju og sólböðum í hóf og halda sig frá reykingum," segir Gústaf Gústafsson, markaðs- og fjáröflunarstjóri hjá Krabbameinsfélaginu.

„Batahorfur þeirra sem greinast með krabbamein hér á landi eru almennt góðar en brýnt er að greina meinin snemma, og því skiptir máli að karlar séu meðvitaðir um krabbamein og einkenni þeirra. Með þrílita bindinu gefst okkur færi á að sýna samstöðu og vekja aðra menn til meðvitundar um krabbamein," segir Gústaf og bætir við að vonir standi til að gera samstarfið við Herragarðinn að árlegum viðburði.