Tölum hreint út um hlutina

Baldvin Jónsson skrifar um stjórnmálaumræðu

Ég sat við tölvuna mína á föstudagskvöld og horfði á kosningasjónvarp RÚV. Þar sátu fyrir svörum talsmenn þeirra hreyfinga sem bjóða fram fyrir komandi kosningar. Eftir umræðuna í samfélaginu undanfarnar vikur, byltinguna, kröfuna um nýjar hugmyndir og víðtæka endurnýjun, varð ég fyrir ansi miklum vonbrigðum við að heyra enn einu sinni sömu gömlu síbyljuna dynja á hlustum mínum frá talsmönnunum og þá alveg sérstaklega Bjarna Benediktssyni sem sat þarna sem formaður Sjálfstæðisflokksins.

Það tók þó steininn úr þegar rætt var um atvinnuástandið á Íslandi og hvað ætti að gera til að skapa hér störf. Enn einu sinni upphófst umræðan um stóriðju sem ætti að bjarga hér öllu. Bjarni Benediktsson gekk jafnvel svo langt að staðhæfa að nýtt álver myndi skapa hér þúsundir starfa, já allt að 20.000 ný störf. Fyrir utan augljóst innihaldsleysi þeirrar staðhæfingar tel ég kominn tíma til að að segja fólki hér einfaldlega satt. Það er engin stóriðjuuppbygging væntanleg hér á landi á næstunni. Það er ekki í boði fjármagn til verksins og mikill samdráttur á álmörkuðum.

Borgarahreyfingin vill einbeita sér að því að taka á bráðavanda heimilanna. Með því að létta undir með heimilunum eykst hér neysla sem í keðjuverkun styrkir hér atvinnulífið. Sterkt atvinnulíf er grundvöllur þess að skapa hér ný störf eins og við vitum.

Við teljum afar áríðandi að taka á þeim félagslegu aðstæðum sem fylgja langvarandi atvinnuleysi. Við verðum að styðja það fólk og fjölskyldur sem verða án atvinnu til lengri tíma. Hugmyndir okkar snúa meðal annars að endurmenntun, að styðja fólk til náms og þátttöku í samfélagslegum verkefnum.

Borgarahreyfingin vill auka lýðræði og minnka kjaftæði. Tölum hreint út um hlutina. Sættum okkur ekki lengur við þetta pólitíska málæði, segjum bara satt.

Höfundur er frambjóðandi Borgarahreyfingarinnar í Reykjavík suður.