Níræður nasisti ákærður fyrir fjöldamorð

Þýskur saksóknari hefur ákært níræðan fyrrum nasista fyrir morð á 58 ungverskum gyðingum í mars 1945. Ákæran kemur í kjölfar þess að austurrískur háskólanemi birti niðurstöður rannsóknar sinnar á fjöldagröf í Deutsch Schuetzen sem er þorp í Austurríki. Manninum, sem aðeins hefur verið skilgreindur opinberlega sem eftirlaunaþegi frá Duisburg, er gefið að sök að hafa í félagi við SS-sveit skotið gyðingana til bana eftir að hafa látið þá krjúpa hjá gröfinni. Þrír fyrrum félagar Hitlersæskunnar hafa vitnað um atburðina sem áttu sér stað í Deutsche Schuetzen og sá fjórði verður yfirheyrður í vikunni. Dómstóll í Duisburg á þó enn eftir að ákveða hvort réttað verði yfir hinum ákærða.