Ísland fær alls enga sérmeðferð hjá NIB

Tilkynning Norræna fjárfestingarbankans á hærri vaxtakjörum á nokkrum íslenskum lánum er í fullu samræmi við reglur bankans, segir Johnny Åkerholm, forstjóri bankans. Hann segir Íslendinga fá sömu meðferð hjá bankanum og aðra.

„Bankinn hefur ekki tekið neina ákvörðun um að hætta að fjármagna verkefni á Íslandi, alls enga. En við störfum náttúrlega einnig, líkt og alþjóðlegar lánastofnanir og einkabankar, eftir reglum um eðlilega bankastarfsemi og við metum áhættuna þegar kemur að fjármögnun og lánveitingum.

Á Íslandi höfum við verið settir í flokk með fjárfestum í einkageiranum og það hefur að sjálfsögðu aukið áhættu okkar umtalsvert. Það sést best á því að virðisrýrnun lána okkar kemur í raun frá Íslandi."

Líkt og Fréttablaðið greindi frá tilkynnti bankinn nokkrum íslenskum lántakendum um hærri vaxtakjör á lánum. Á langtímalánum eru vaxtakjör endurskoðuð reglulega.

„Við endurmat tökum við tillit til aukinnar áhættu. Við mátum þessi lán alveg eins og við hefðum gert við lán frá öðrum löndum, hvort sem það væri Svíþjóð eða Finnland, svo dæmi sé tekið. Áhættan hefur aukist og því hækka vextirnir."

Johnny segir að vegna mistaka hafi það gerst í einhverjum tilvikum að lántakanum hafi ekki verið tilkynnt um endurmat innan tilskilins frests, sem er 45 dögum fyrir vaxtaákvörðunardag. Endurskoðun verði frestað í þeim tilvikum.

„Við endurskoðun hefur bankinn samband við viðskiptavini og tilkynnir um breytta vaxtaákvörðun. Viðskiptavinurinn getur þá kosið að taka lán annars staðar og greiða lánið upp hjá okkur ef hann er ósáttur, eða samþykkt kjör okkar eða endursamið. Um þetta gilda sömu reglur fyrir alla."

Forstjórinn segir bankann fylgjast vel með því hvað alþjóðleg matsfyrirtæki gera og ljóst sé að lánshæfismati Íslands hafi hrakað umtalsvert. Ísland sé þó ekki eina landið þar sem áhættumat hafi breyst vegna efnahagsástandsins og vextir séu endurmetnir í takt við það. „Við höfum þó ekki lent í sérstökum vandræðum nema á Íslandi."

Norræni fjárfestingarbankinn á umtalsverða kröfu í þrotabú gömlu bankanna.

kolbeinn@frettabladid.is