Maraþonfundi fjárlaganefndar lokið

„Þetta eru miklir maraþonfundir," segir Höskuldur Þórhallsson, fulltrúi Framsóknar í fjárlaganefnd, en hann var að koma út af rúmlega þriggja tíma löngum nefndarfundi um Icesave málið þegar fréttastofa náði af honum tali.

Fundurinn var sá þriðji sem fjárlaganefnd hélt um málið í dag, en hún fundaði einnig klukkan 8:30 og 11 í morgun.

Höskuldur taldi líklegt að áfram yrði unnið að málinu í kvöld, þó formlega sé fundahöldum lokið. Hann segir það markmiðið að nefndarmenn nái lendingu sem sátt ríki um.

„Það ætti að koma í ljós á morgun hvort það sé mögulegt að ná algjörlega sameiginlegri niðurstöðu."

Um fyrirvara við samninginn segir Höskuldur:

„Það má segja að það sé meiningamunur um hversu langt menn vilja ganga í þeim efnum. En það eru allir, held ég, sammála um að það þurfi að breyta samningnum."

Er hann þá bjartsýnn á að samhljómur náist um málið innan nefndarinnar á morgun?

„Ég er alltaf bjartsýnn, en ég veit það ekki. Þetta er mál af þeirri stærðargráðu og menn eru búnir að vera lengi með það í maganum. Kannski erum við að flýta okkur um of akkúrat núna þegar við loksins erum sammála um að samningarnir ganga ekki óbreyttir. Við ætlum samt að reyna að gera þetta hratt."