Ríkisskattstjóri hótar lögmönnum vegna eiganda aflandsfélaga

Ríkisskattstjóri hefur hótað tug lögmanna málssókn veiti þeir ekki upplýsingar um hverjir eru raunverulegir eigendur aflandsfélaga sem þeir stofnuðu fyrir viðskiptavini sína í skattaparadísum.

Ríkisskattstjóri hefur undanfarið unnið að því að greina eignarhald á íslenskum fyrirtækjum og tengsl íslenskra aðila, einstaklinga sem fyrirtækja, við erlend félög í skattaskjólum. Um 400 félög hafa verið til skoðunar.

Samkvæmt heimildum fréttastofu stofnuðu íslensku bankarnir um 250 aflandsfélög. Íslensku bankarnir í Lúxemborg og lögmenn stofnuðu hin 150 sem eru til skoðunar. Ríkisskattstjóri hefur að undanförnu sent fyrirspurnir bæði til banka og lögmanna um hverjir séu raunverulegir eigendur félaganna. Nokkuð hefur borið á því að lögmenn neita að svara og bera fyrir sig trúnaðarskyldu við umbjóðendur sína.

Þá hafa bankarnir einnig neitað að gefa upplýsingar á þeirri forsendu að þær liggi í Lúxemborg og því ekki aðgengilegar. Margt bendir þó til að bankarnir hér á landi búi í reynd yfir þessum upplýsingum.

Samkvæmt heimildum fréttastofu hefur Ríkisskattstjóri nú sent ítrekunarbréf til tug lögmannanna þar sem hnekkt er á nýju ákvæði í skattalögum um að lögaðilum beri að veita upplýsingar um erlend dótturfélög sín. Geri þeir það ekki muni þeir eiga á hættu að Ríkisskattstjóri höfði mál gegn þeim.

Nokkrir lögmenn munu í kjölfarið hafa veitt upplýsingarnar en enn eru nokkrir sem hafa ekki orðið við því.