Framkvæmdastjóri Borgarahreyfingarinnar hættur

Jóhann Kristjánsson hefur látið af störfum sem framkvæmdastjóri þingflokks Borgarahreyfingarinnar eftir þrjá mánuði í starfi. Hann segist hætta í góðri sátt. „Það stóð aldrei til að ég yrði þarna til eilífðarnóns."

Jóhann var kosningastjóri Borgarahreyfingarinnar í kosningabaráttunni í vor en af þeim loknum var hann ráðinn sem framkvæmdastjóri þingflokks hreyfingarinnar.

Hart hefur verið deilt í Borgarahreyfingunni að undanförnu um persónur og málefni hennar. Sér í lagi eftir að þrír þingmenn hreyfingarinnar, þau Birgitta Jónsdóttir, Margrét Tryggvadóttir og Þór Saari, greiddu atkvæði gegn aðildarumsókn Íslands að ESB. Fjórði þingmaðurinn, Þráinn Bertelsson, vill að þremenningarnir víki vegna málsins og kalli inn varamenn. Nú hafa þeir gefið út þá yfirlýsingu að þeir vilji að Þráinn víki og taki sér umhugsunarfrest um framtíðar aðkomu sína að málefnum hreyfingarinnar.

Jóhann hætti sem framkvæmdastjóri um síðustu mánaðarmót. Hann segir að hann hafi tekið þátt í að stofna hreyfinguna og verið kosningastjóri hennar í vor. Kosningabaráttan hafi gengið vel og að hreyfingin hafi náð inn góðum hópi á þing.

„Ég hafði ákveðnar hugmyndir um það hvernig ég vildi halda starfi Borgarahreyfingarinnar áfram en það var ekki tekið sérstaklega vel í það."

Jóhann segir mestu vonbrigðin vera að fólk geti ekki unnið betur saman og vera þess í stað alltaf með læti í fjölmiðlum. „Þeir sem vilja stýra verða að fá að prófa það," segir Jóhann og á þá við fólk í stjórn hreyfingarinnar. Hann hyggst starfa áfram í Borgarahreyfingunni.