Skaðlegt að afnema verðtryggingu

Ekki er ráðlegt að afnema verðtrygginguna með lagasetningu, að mati Seðlabanka Íslands. Forsenda þess að dregið sé úr notkun verðtryggingarinnar er annað hvort stöðugleiki til lengri tíma eða upptaka nýrrar myntar.

Afnám verðtryggingar með lagasetningu er ekki líklegt til að auka virkni peningastefnunnar umtalsvert, og gæti raunar haft skaðleg áhrif á efnahagsbatann, segir í samantekt Seðlabankans, sem unnin var af sérfræðingum bankans fyrir forsætisráðherra.

Eigi að minnka vægi hennar öðruvísi en með lagasetningu eða upptöku evrunnar eða annarrar erlendrar myntar þarf að reka aðhaldsama peninga- og efnahagsstefnu, segir í samantektinni. Það muni leiða til langvarandi stöðugs verðlags og þar af leiðandi lítilla verðbólguvæntinga. Líklega sé þó fljótlegra og sársaukaminna að taka upp aðra mynt en krónuna.

Sérfræðingur Seðlabankans segir verðtrygginguna hafa auðveldað landsmönnum aðgengi að langtímalánum á föstum vöxtum. Verði verðtryggingin afnumin með lagasetningu sé líklegt að slíkt aðgengi verði úr sögunni.

Færri verði fúsir til að lána til langs tíma, sem þýði að húsnæðislán verði væntanlega til skemmri tíma en nú tíðkast. Þá verða lánin væntanlega alltaf með breytilegum vöxtum, sem myndu hækka og lækka nokkurn veginn í takt við verðbólguþróunina.