Leggja fram frumvarp svo fyrrum starfsmenn Spron fái greidd laun

Viðskiptanefnd Alþingis hefur lagt fram frumvarp sem felur í sér breytingar á lögum um fjármálafyrirtæki. Nefndin vonar að með frumvarpinu verði hægt að greiða rúmlega 100 fyrrverandi starfsmönnum Spron laun. Starfsmennirnir hafa ekki fengið greidd laun frá mánaðarmótum vegna lagatúlkunar skiptanefndar sparisjóðsins.

Slitastjórnin tilkynnti starfsmönnum Spron 30. júní að þeir fengju ekki greidd laun í uppsagnarfresti þar sem slitastjórnin taldi sig ekki hafa lagaheimild til þess að greiða launin.

Bæði Gylfi Magnússon, viðskiptaráðherra, og Álfheiður Ingadóttir, formaður viðskiptanefndar, hafa bæði lýst yfir vilja til að greiða úr málinu.

Fram kemur í greinargerð með frumvarpinu að viðskiptanefnd hafi leitað álits hjá viðskiptaráðuneytinu og réttarfarsnefnd og það hafi verið samdóma mat þessara aðila að heimildir skorti ekki svo framarlega sem fullnægt væri þeim skilyrðum að slitastjórn viðurkenndi kröfurnar fyrir sitt leyti og teldi víst að félagið ætti nægar eignir til að standa sömu hlutfallsleg skil á öllum forgangskröfum sem gætu notið sömu eða hærri stöðu í skuldaröð. Slitastjórnin hefur ekki fallist á þessa niðurstöðu stjórnvalda

„Í ljósi þess óhagræðis og tjóns sem þessi staða hefur þegar valdið ríflega 100 fyrrverandi starfsmönnum SPRON og til þess að komast hjá frekara tjóni sem málshöfðun hefur í för með sér með tilheyrandi drætti á greiðslu þessara launakrafna fyrrverandi starfsmanna telur nefndin ekki annað fært en að treysta þær heimildir sem slitastjórnin hefur samkvæmt framangreindu áliti, í þeirri von að hún muni nú nýta þær, og flytur því frumvarp þetta," segir í greinargerðinni.