Ætla að efla aðstoð við landbúnað í þróunarríkjum

„Í heiminum er meira en nóg til af mat,“ segir Ban Ki-moon, framkvæmdastjóri Sameinu þjóðanna. „Samt þarf meira en milljarður manna að líða hungur. Þetta er óþolandi.“

Þetta sagði hann við upphaf alþjóðlegu matvælaráðstefnunnar, sem hófst í Róm í gær á vegum Matvæla- og landbúnaðarstofnunar Sameinuðu þjóðanna, FAO.

Fulltrúar ríkja heims samþykktu samhljóða að auka fjárhagsaðstoð við landbúnað í þróunarheiminum. Ekki gátu þeir þó komið sér saman um að viðbótarfjárhæðin nemi 44 milljörðum Bandaríkjadala á ári.

Matvæla- og landbúnaðarstofnunin hafði sagt þessa upphæð nauðsynlega næstu áratugina, eigi að takast að gera þann milljarð manna, sem býr við hungur, sjálfum sér nógan um fæðu.

Stofnunin hafði einnig gert sér vonir um að ríki heims myndu setja sér það markmið, að hungri verði útrýmt úr heiminum fyrir árið 2025. Þess í stað héldu fulltrúar ráðstefnunnar sér við gamla markmiðið, sem sett var árið 2009, að fækka um helming fyrir árið 2015 þeim sem búa við hungur.

Matvælaaðstoð hefur til þessa einkum falist í því, að auðug ríki hafa sent matvæli til fátækra ríkja, frekar en að senda þangað tækjabúnað, áburð og fræ eða útvega þeim aðstoð við áveitugerð og tæknikunnáttu, sem gæti komið bændum og veiðimönnum að gagni.

Matvælin hafa svo að stórum hluta verið keypt af bændum í auðugu ríkjunum, þannig að þeir hafa hagnast á aðstoðinni.

Matvælastofnunin segir að þetta verði að breytast.

„Verkefni okkar er ekki bara að útvega þeim sem hungrar fæðu, heldur gera þeim kleift að afla sér fæðu sjálfir,“ sagði Ban.

Matvælastofnunin segir að alþjóðasamfélagið hafi árum saman vanrækt landbúnaðarmál. „Stöðug fjárfesting í landbúnaði, sérstaklega landbúnaði smábænda, er lykillinn að matvælaöryggi,“ segir stofnunin í yfirlýsingu sinni.

Vonast er til að þessi ráðstefna verði til þess að sú breyting, sem boðuð var á G8-fundinum í L‘Aquila á Ítalíu í sumar, nái fyrr fram að ganga. Þar hétu leiðtogar átta helstu iðnríkja heims því að verja 20 milljörðum Bandaríkjadala næstu þrjú árin í aðstoð við fátæka bændur.

gudsteinn@frettabladid.is