Fjarvera annarra þingmanna hafði ekki áhrif á afgreiðslu Icesave

Tveir þingmenn, utan Lilju Mósesdóttur, voru fjarverandi fund efnahags- og skattanefndar þegar umsögn um Icesave málið var afgreidd þaðan síðastliðinn miðvikudag til fjárlaganefndar.

Eins og Vísir greindi frá kallaði Lilja inn varamann í pólitískum tilgangi, þar eð hún vildi hvorki greiða umsögninni atkvæði með eða á móti, þrátt fyrir að hún væri henni andsnúin.

Að sögn þeirra Magnúsar Orra Schram, þingmanns Samfylkingar, og Birkis Jóns Jónssonar, þingmanns Framsóknar, sem báðir kölluðu inn varamann á sama fund voru forföll þeirra ekki pólitísk.

„Ég var bara fjarverandi og það voru löggildar ástæður fyrir því," segir Magnús Orri. Hann segist hafa tekið þátt í að semja nefndarálitið svo hann hefði greitt atkvæði með málinu, rétt eins og varamaður hans gerði.

„Fjarvera mín tengdist ekki afstöðunni til þessa máls, enda liggur hún alveg fyrir," segir Birkir Jón. Hann var norður í landi þegar atkvæðagreiðslan fór fram, en hann varð þrítugur um helgina.

Birkir segir varamann sinn hafa greitt atkvæði á móti umsögninni, rétt eins og hann hefði sjálfur gert, og telur fjarveru sína ekki hafa haft áhrif á afgreiðslu málsins.

Eins og Vísir greindi frá í dag var Guðfríður Lilja Grétarsdóttir, þingmaður Vinstri-grænna, fjarverandi afgreiðslu sama máls úr utanríkismálanefnd.

Guðfríður hefur ekki svarað ítrekuðum tilraunum fréttastofu til að leita skýringa á fjarveru hennar og afstöðu til málsins.