Seðlabankinn ánægður með viðræður um gjaldeyrismál

Seðlabankinn er ánægður með árangurinn af viðræðum sínum við útflutningsaðila um framkvæmdina á reglum varðandi gjaldeyrishöftin. Samkvæmt upplýsingum frá bankanum er aðeins eftir að ræða við örfáa af þeim rúmlega 20 aðilum sem bankinn boðaði á sinn fund fyrr í sumar.

„Varðandi viðræður við fyrirtæki um reglur um gjaldeyrismál þá er á þessu stigi aðeins hægt að segja að þær hafi gengið vel og Seðlabankinn sé ánægður með þær," segir Stefán Jóhann Stefánsson ritstjóri Seðlabankans. „Með þessum viðræðum fæst meðal annars betri mynd af því hvernig reglurnar virka í starfsemi fyrirtækjanna."

Stefán Jóhann segir ennfremur að væntanlega verði komið nánar inn á þetta í þeim skýrslum eða ritum sem bankinn gefur út á næstunni.