Samkomulag við AGS um aðra endurskoðun

Náðst hefur samkomulag milli stjórnvalda og starfsmanna Alþjóðagjaldeyrissjóðsins (AGS) um aðra endurskoðun efnahagsáætlunar þeirra sem stjórnvöld og sjóðurinn komu sér saman um í nóvember í fyrra.

Franek Rozwadowski, sendifulltrúi AGS með aðsetur hér á landi og Mark Flanagan, yfirmaður sendinefndar AGS um málefni Íslands, kynntu niðurstöðu viðræðna sem staðið hafa frá fyrsta desember á fundi í Seðlabankanum í gær.

Fram kom á fundi þeirra að slak­að hefur verið á kröfu um niðurskurð hjá ríkinu frá fyrri áætlun. Núna er gert ráð fyrir að niðurskurður nemi 4,5 prósentum af landsframleiðslu, í stað 5,5 prósenta áður. „Hvar nákvæmlega verður skorið niður er stjórnvalda og almennings á Íslandi að ákveða,“ áréttaði Flanagan, og taldi að með áætluninni væri gætt að lykilþáttum í uppbyggingu norræns velferðarsamfélags.

Flanagan sagði að í viðræðunum hafi verið lögð áhersla á fjárhagsáætlun ríkisins 2010, leiðir til að stýra opinberum skuldum og skref til að endurfjármagna fjármálakerfið og styrkja regluverk þess. Stjórnvöld og sendinefndin vænta þess að í janúar verði búið að hrinda í framkvæmd öllum stefnumarkandi aðgerðum sem varða aðra endurskoðun áætlunarinnar. „Að því gefnu að fjármögnun áætlunarinnar sé trygg má ætla að leggja megi endurskoðunina fyrir framkvæmdastjórn AGS,“ bætti hann við.

Flanagan segir að þótt sendinefndinni sé ljóst að hagkerfi landsins standi frammi fyrir erfiðri aðlögun þá hafi aðgerðir, sem þegar hafi verið gripið til, orðið til þess að gera samdráttinn minni en búist hafi verið við. Hann sagði búist við að hagvöxtur taki við sér á ný þegar á næsta ári og að með styrkri stjórn peningamála væru innan seilingar markmið hvað varðar stöðugleika krónunnar og verðbólgu.

Sendinefndin komst að því að horfur hafi batnað hvað varðar opinberar skuldir, en í því speglast endurfjármögnun tveggja stóru bankanna. Þá séu heildaskuldirnar líka heldur lægri, en erlendar skuldir einkafyrirtækja hærri en búist hafi verið við.

„Heildarbyrði erlendra skulda er því aðeins yfir fyrri áætlunum,“ sagði hann, en áréttaði að þær væru viðráðanlegar. Gert er ráð fyrir að heildarskuldabyrði þjóðarinnar verði nær 307 prósentum af landsframleiðslu, nokkuð undir orðrómi um annað, að sögn Flanagans. Inni í þeim útreikningum er bæði endurfjármögnun bankanna og kostnður vegna Icesave.