Flanagan: Öll skilyrði uppfyllt fyrir endurskoðun AGS

Mark Flanagan formaður sendiefndar Alþjóðagjaldeyrissjóðsins (AGS) á Íslandi segir að öll megin skilyrðum séu uppfyllt fyrir endurskoðun sjóðsins á áætlun sinni og íslenskra stjórnvalda. Þetta kemur fram í viðtali við Flanagan á heimsíðu AGS.

„Við erum komin með grunn til að byggja á í framtíðinni," segir Flanagan en í viðtalinu fer hann ítarlega yfir stöðu mála og þá þróun sem átt hefur sér stað síðan að áætlun sjóðsins og stjórnvalda var samþykkt fyrir síðustu áramót.

Aðspurður um stöðu efnahagsmála á Íslandi í dag segir Flanagan að ekki verði hjá því komist að Ísland finni fyrir kreppunni af fullum þunga á þessu ári. Atvinnuleysi sé þegar yfir 7% og að landsframleiðslan muni dragast saman um 8,5%. Hið jákvæða sé að þrátt fyrir að þetta séu stórar tölur eru þær samt minni en upphaflega var gert ráð fyrir.

„Á sama tíma hefur undist ofan af mikilli verðbólgu og gríðarlegum viðskiptahalla," segir Flanagan. „Stöðugleiki hefur komist á fjármálamarkaðinn og gengið hefur haldist á svipuðum slóðum og það var lægst fyrir hrunið."

Í viðtalinu er Flanagan spurður um gífurlegar erlendar skuldir Íslendinga. Hann segir að skuldasúpan í heild sinni muni fara í um 310% af landsframleiðslu. Hinsvegar muni brúttóskuldir hins opinbera ná hámarki í 135% af landsframleiðslunni.

„Heildarskuldirnar eru mun hærri en við mátum þær í kjölfar hrunsins s.l. haust" segir Flanagan. „En þótt þær séu háar metum við að þær séu viðráðanlegar."

Flanagan segir að hinar erlendu skuldir muni lækka eftir því sem endurheimtur úr hinum föllnu bönkum aukast og eftir því sem skuldir fyrirtækja og fjármálageirans verða afskrifaðar. „Þar að auki á Ísland verulegar erlendar eignir sem eru í eigu lífeyrissjóðakerfisins," segir Flanagan.

Hvað varðar skuldir hins opinbera segir Flanagan að lykillinn þar sé metnaðargjörn fjárhagsleg aðlögun að ástandinu. Hvað varðar samanburð við önnur lönd í þessu tilviki nefnir Flanagan sömu rökin og fyrir heildarskuldunum. AGS hafi framkvæmt álagspróf hvað skuldir landsins varðar og þar hafi Icesave skuldirnar verið teknar með í reikninginn. Þótt skuldirnar séu háar nú muni þær fara lækkandi og það sé jafnvel hægt að ráða við frekari áföll.

Hvað varðar vaxtalækkun segir Flanagan að AGS ráðleggi stjórnvöldum ennþá að fara sér varlega í þeim efnum. Hann bendir á að í raun séu stýrivextir nú 9,5% og þeir séu á nokkuð svipuðu róli og í öðrum nýmarkaðalöndum.