Kannast ekki við að hafa hafnað Rússaláni

Hvorki Ingibjörg Sólrún Gísladóttir, fyrrverandi utanríkisráðherra, né Tryggvi Þór Herbertsson, fyrrverandi efnahagsráðgjafi forsætisráðherra, kannast við að ríkisstjórn Sjálfstæðisflokks og Samfylkingar hafi hafnað milljarða láni frá Rússum. Sendiherra Rússa segir að ríkisstjórnin hafi óskað eftir fjögurra milljarða evra láni og síðan afþakkað það.

Í viðtali við vefsíðuna netvarpið.is sagði Victor I. Tantarintsev, sendiherra Rússlands á Íslandi, að ríkisstjórn Geirs H. Haarde, fyrrverandi forsætisráðherra, hefði óskað eftir fjögurra milljarða evra láni.

Í samtali við fréttastofu könnuðust hvorki Ingibjörg Sólrún Gísladóttir, fyrrverandi utanríkisráðherra, né Árni Mathiesen, fyrrverandi fjármálaráðherra, við að lánsboði Rússa hafi verið hafnað.

Tryggvi Þór Herbertsson, þingmaður Sjálfstæðisflokksins og fyrrverandi efnahagsráðgjafi Geirs H. Haarde, fyrrverandi forsætisráðherra, gerði það ekki heldur. Hann hafi í fyrrasumar óskað eftir fimm milljón dala láni frá Rússum fyrir hönd ríkisstjórnarinnar. Síðan hafi verið boðnir fjórir milljarðar evra samkvæmt tilkynningu Seðlabanka Íslands. Það hafi síðan verið dregið aftur að hluta, líkast til vegna efnahagsvanda Rússa. Þegar Tryggvi hafi hætt sem efnahagsráðgjafi hafi enn átt að fá lán hjá Rússum.

Sendinefndir hafa farið frá Íslandi til Rússland síðan í október og rætt um lán. Viðræður um lægra lán en fjóra milljarða munu enn í gangi.