Icesave úr fjárlaganefnd á morgun

Flest bendir til að Icesave samningurinn verði afgreiddur úr fjárlaganefnd á morgun. Nefndin kemur saman að minnsta kosti þrisvar í dag vegna málsins.

Fjárlaganefnd fundaði í morgun og fóru yfir þá fyrirvara á samningnum sem hafa verið til umræðu. Til stóð að farið yrði yfir efnahagslega fyrirvara á samningnum en útreikningar frá Seðlabankanum munu ekki berast fyrr en síðar í dag og er því búist við að nefndin fundi aftur síðdegis, eftir þingflokksfundi. Nú stendur yfir fundur hjá nefndinni en hann hófst klukkan 11.

„Við fáum til okkar Lee Buchheit sem mun meðal annars ræða við okkur um skuldaskil, ríkisábyrgðir og skuldastöðu ríkja,"segir Guðbjartur Hannesson, formaður fjárlaganefndar. Hann segir nefndina hafa fengið ábendingu um þennan sérfræðing en hann starfar hjá lögfræðistofu í Bandaríkjunum.

Guðbjartur segir nefndarmeðlimi gera sér grein fyrir að það liggur á málið verði afgreitt úr nefnd. Allar upplýsingar liggi nú fyrir og nú sé verið að reyna að ná sátt um lagalega fyrirvara inn í frumvarpið.

Heimildir fréttastofu herma að málið verði afgreitt úr nefnd á morgun en Guðbjartur vill ekki tala um neinar dagsetningar í því sambandi.