Hald lagt á 700 kannabisplöntur í þremur húsleitum

Lögreglan á höfuðborgarsvæðinu hefur lagt hald á 700 kannabisplöntur í þremur húsleitum undanfarna daga. Talið er að málin tengist.

Lögreglan stöðvaði kannabisræktun í íbúð í Vesturberginu fyrir nokkrum dögum. Það var svo í gær að lögreglan gerði upptækt umtalsvert magn af kannabisplöntum í íbúð við Skipasund. Nágrannar sem fréttastofa hefur rætt við sögðu að magnið hefði verið það mikið að það hefði fyllt heilan flutningabíl. Þá hefði kannabislykt lagt yfir götuna. Í tilkynningu frá Lögreglu í dag kom fram að um 400 plöntur hafi verið haldlagðar í þessum tveimur húsleitum.

Í fyrradag var einnig framkvæmd húsleit í húsnæði við Eldshöfða. Þar var lagt hald á rúmlega þrjúhundruð plöntur og tveir menn handteknir. Lögreglan rannsakar nú hvort að það tengist hinum málunum tveimur.

Samkvæmt heimildum fréttastofu beinist rannsóknin aðallega að manni á fimmtugsaldri en hann og sambýliskona hans voru handtekinn á Keflavíkurflugvelli í gærkvöld. Þá var maður á sextugsaldri einnig handtekin og er hann grunaður um að hafa haft yfirumsjón með ræktuninni. Konan er skráður eigandi íbúðarinnar í Vesturberginu og félag í eigu sambýlismanns hennar er skráð fyrir íbúðinni í Skipasundinu.

Skýrslutökur fóru fram í nótt og var áframhald á þeim í dag. Öllum hefur verið sleppt úr haldi og er gæsluvarðhalds ekki krafist. Fólkið segist saklaust og að íbúðirnar hafi verið í útleigu. Það hafi því verið tilviljun að kannabisræktun hafi verið í gangi í þeim báðum.