Hyggjast stoppa í 20 milljarða fjárlagagat á árinu

Um níu þúsund opinberir starfsmenn mega búast við lækkun heildarlauna, sælgæti og gos hækkar og margvíslegur niðurskurður verður í starfsemi ríkisins. Tryggvi Þór Herbertsson þingmaður Sjálfstæðisflokksins furðar sig á að ekki skuli farið út í að innheimta skatt af lífeyristekjum, sem gæfi nánast sama pening í ríkissjóð og allar skattahækkanir og aðhald á þessu ári.

Bandormurinn kom loks fram í gærkvöldi, frumvarpið sem tekur á því hvernig stjórnvöld ætla að stoppa upp í 20 milljarða króna fjárlagagat. Á þessu ári á að ná inn 22,4 milljörðum króna tæpum, með skattahækkunum upp á 13 milljarða og niðurskurði og frestun framkvæmda upp á 9,4 milljarða. Á næsta ári á að ná hallanum niður um röska 63 milljarða með heldur meiri niðurskurði en hækkunum skatta.

Skattahækkanir hafa áður komið fram, nema sykurskatturinn -sem verður að veruleika fyrsta september, þegar virðisaukaskattur á sykur, sætindi og óáfengar drykkjarvörur hækkar upp í 24,5 prósent. Þetta er eini liður skattahækkana í bandorminum sem mun hafa áhrif á neysluvísitölu, um 0,25% stig er talið, sem þýðir hækkun á skuldum heimila um 3600 milljónir króna.

Stjórnvöld hafa verið gagnrýnd fyrir að ná hallanum niður með meiri skattahækkunum en niðurskurði.

Margvíslegur niðurskurður verður hjá ríkinu, dregið úr nefndalaunum, risnu, bílakostnaði, hámarksgreiðslur í fæðingarorlofi lækka niður í 350 þúsund krónur og frítekjumark ellilífeyrisþega verður lækkað svo nokkuð sé nefnt. Þá verða laun þeirra níu þúsund opinberra starfsmanna sem hafa yfir 400 þúsund krónur í heildarlaun, endurskoðuð - þó verður ekki hróflað við töxtum eða farið inn í kjarasamninga. Forðast verður að segja upp fólki eftir fremsta megni.

Fram kom á þingi í dag að hallinn væri enn meiri en áætlað var, segir Tryggvi.

Og þá verður sporsla til æðstu manna ríkisins afnumin, hún vegur kannski ekki þungt, en er táknræn. Þegar forseti flýgur af landi brott fá staðgenglar hans - forsætisráðherra, forseti alþingis og forseti Hæstaréttar, laun ofan á sín eigin meðan forsetinn er erlendis. Þessi laun hlaupa á milljónum árlega.