Guðfríður Lilja var ekki á áliti utanríkismálanefndar

Guðfríður Lilja Grétarsdóttir, fulltrúi Vinstri hreyfingarinnar - græns framboðs, mætti ekki á fund utanríkismálanefndar Alþingis þegar gengið var frá umsögn nefndarinnar í Icesavemálinu fyrir helgi, samkvæmt heimildum fréttastofu.

Árni Þór Sigurðsson, formaður nefndarinnar, sat fundinn fyrir VG ásamt Álfheiði Ingadóttur, sem sat hann í fjarveru Guðfríðar Lilju. Fréttastofa hefur ítrekað reynt að ná sambandi við Guðfríði Lilju síðan að málið var afgreitt úr utanríkismálanefnd en án árangurs.

Guðfríður Lilja hefur lýst efasemdum gagnvart Icesavesamningnum. Það hefur Lilja Mósesdóttir samflokkskona hennar líka gert en hún var fjarverandi þegar málið var afgreitt úr efnahags- og skattanefnd á miðvikudag. Aðspurð sagði Lilja þá að ef hún hefði kosið gegn málinu hefði það þýtt að hún væri að segja sig úr stjórnarliðinu. Ekki væri rétt að blanda Icesave málinu saman við ríkisstjórnarmynstur á þessu stigi málsins.