Sakborningar segja gleðikonur hafa verið skráðar fyrir Papeyjarskútunni

Þrír sakborninga í Papeyjarmálinu sem eiga að hafa siglt fíkniefnunum til Íslands neita allir sök og segjast hafa verið í tveggja vikna fríi á skútunni. Nöfn þriggja íslenskra kvenna voru skráð í áhöfn skútunnar en tveir sakborninga segja þær hafa verið gleðikonur. Þær hafi aldrei komið um borð.

Þetta kom fram í aðalmeðferð málsins sem hófst í Héraðsdómi Reykjavíkur í morgun. Hollendingurinn Peter Rabe sem er meintur höfuðpaur í málinu var yfirheyrður fyrst. Hann neitaði sök og sagði að hann Rúnar Þór Róbertsson og Árni Hrafn Ásbjörnsson hafi ákveðið að fara í tveggja vikna frí á skútunni Sirtaki sem hófst í Belgíu í byrjun apríl. Þetta staðfestu Rúnar Þór og Árni Hrafn í morgun. Peter Rabe leigði skútuna á sínu nafni en ásamt þeim þremur voru skráð þrjú nöfn íslenskra kvenna. Bæði Peter og Rúnar Þór segja þær hafa verið gleðikonur sem átti að sækja til Hollands. Ákveðið hafi verið að sleppa því og því komu þær aldrei um borð í skútuna. Hvorki Peter Rabe né aðrir vilja kannast við hvernig nöfn þessara kvenna komust á áhafnarlistann. Skútunni var siglt dag og nótt að ströndum Íslands. Nákvæmar staðsetningar hafa ekki komið fram en talið er að skútan hafi verið um 30-40 sjómílum frá landi.

Hinir þrír sakborningarnir hafa játað sök í málinu en segjast hafa haldið að verið væri að flytja inn stera. Jónas Árni Lúðvíksson segist hafa haft milligöngu um málið. Hann hafi búið í Rotterdam á þessum tíma og menn hafi haft samband við hann og spurt hvort hann hefði áhuga á að flytja inn stera til landsins. Jónas útvegaði bíl og slöngubát fyrir flutning efnanna. Hann viðurkenndi fyrir dómi í morgun að hafa svo fengið Pétur Kúld Pétursson og Halldór Hlíðar Bergmundsson til liðs við sig. Hann segir þá ekki hafa vitað um málið fyrr en á seinni stigum þess auk þess sem þeir héldu að um stera væri að ræða. Halldór sigldi með Jónasi á slöngubátnum og tók á móti fíkniefnunum en Pétur ók bílnum sem flutti þau frá höfninni í Djúpavogi. Jónas vildi ekki gefa upp nöfn þeirra sem afhendu þeim fíkniefnni úr skútunni og sagði að sér hefði verið hótað eftir að hann losnaði úr einangrun á Litla hrauni. Aðalmeðferð málsins mun standa yfir í dag og á morgun.