Segir ódýrustu hjólbarðana í Hafnarfirði

„Við erum ekki að keyra þetta áfram á einhvejrum afslætti heldur erum bara á þröngum verðum sem gilda fyrir alla, við erum ódýrastir miðað við þessar kannanir og það sem ég hef heyrt," segir Hörður Þráinsson hjá Hjólbarðaþjónustu Hafnarfjarðar. Hörður er ósáttur með að vera ekki inni í könnun ASÍ um verð á hjólbörðum hér á landi. Fólksbílarnir hjá Herði eru á 4.990 kr. og jepplingarnir svokölluðu eru á 6.990 kr. „sem er ódýrara en fólksbílarnir hjá sumum."

Hörður hefur verið í bransanum í tuttugu ár en hefur rekið Hjólbarðaþjónustu Hafnarfjarðar í tvö ár. Hann segir að þrátt fyrir gríðarlegar verðhækkanir á dekkjum hafi hann haldið sömu verðum og hann var með í haust.

„Ég lageraði mig vel upp í haust sem kemur sér vel þar sem allar vörur hafa hækkað um nánast helming. Þetta er auðvitað frekar þungur róður hjá flestum en líklega skást hjá mér þar sem ég er ekki að flytja inn dekk sjálfur," segir Hörðru og bætir við að hann væri löngu farinn yfir ef hann stæði í því.

„Ég tek inn dekk frá öllum heildsölum og er alltaf með Mitchelin eða Bridgestone. Síðan reyni ég að finna ódýrari dekk og spanna þannig alla flóruna."