Hald lagt á glæsivillur og báta Madoffs

Glæsivillur, bílar, bátar og silfurmunir í eigu fjárfestisins Bernard Madoff og eiginkonu hans eru meðal þess sem yfirvöld munu taka í sínar vörslur. Þetta var meðal þess sem var á lista saksóknara sem hann lagði fram við réttarhöldin í New York en Madoff hefur játað á sig 11 ákærur vegna svika.

Madoff leikur aðalhlutverkið í stærsta svikamáli sem upp hefur komið á Wall Street, en hann er ákærður fyrir að hafa dregið að sér allt að 50 milljarða dollara með svikum á tuttugu ára tímabili.

Hann situr nú í fangelsi og bíður dóms en talið er að hann gæti setið inni til æviloka. Villur Madoffs á Manhattan, Palm Beach, Florida, Frakklandi og New York eru meðal þess sem er á umræddum lista.

Þrír bátar að verðmæti 7 milljóna punda og Steinway píanó sem talið 27 þúsund punda virði voru einnig á listanum.

Eignir Madoffs voru frystar eftir að hann var handtekinn í desember á síðasta ári.

Svindl Madoffs hefur verið nefnt pýramídasvinld sem hann dulbjó sem vogunarsjóð en hann er fyrrum forstjóri Nasdaq kauphallarinnar. Fjölmargir bankar og fjármálastofnanir um víða veröld töpuðu milljónum á svinldinu.