Rangfærslur Sigrúnar Elsu

Í grein Sigrúnar Elsu Smáradóttur, borgarfulltrúa og stjórnarmanns í REI, í Fréttablaðinu miðvikudaginn 15. júlí sl. koma fram nokkur mikilvæg atriði sem fá ekki staðist eða eru beinlínis röng.

1. Hún fullyrðir að hlutur Reykjavíkurborgar í Landsvirkjun hafi verið seldur á of lágu verði. Staðreyndin er sú að hlutur Reykjavíkurborgar í Landsvirkjun var seldur á góðu verði miðað við öll gögn sem lágu fyrir í málinu. Það var og er m.a. skoðun borgarhagfræðings, sem var fulltrúi borgarinnar í söluferlinu. Í dag er núvirði söluverðsins rúmlega 32 milljarðar króna. Þessir fjármunir hafa meðal annars gert það að verkum að fjárhagsleg staða borgarinnar er miklu traustari en ella hefði verið og um leið lánshæfi, rekstrarstaða og lausafjárstaða borgarinnar. Þetta er mat borgarhagfræðings og fjármálastjóra borgarinnar. Fullyrðingar hennar um að Landsvirkjun hafi ekki greitt Reykjavíkurborg ábyrgðargjald eins og ætlast er til eru rangar. Í bréfi Friðriks Sophussonar, forstjóra Landsvirkjunar, dags. 16. júlí sl., til Sigrúnar Elsu (afrit m.a. sent undirrituðum) eru þessar rangfærslur hennar leiðréttar.

2. Sigrún Elsa gerir enga grein fyrir þeirri ákvörðun 100 daga meirihlutans að REI hafi ætlað, með samþykki stjórnar Orkuveitu Reykjavíkur, á stjórnarfundi fyrirtækisins þann 3. nóvember 2007, að kaupa hlutabréf fyrir 12,5 milljarða íslenskra króna í ríkisreknu orkufyrirtæki á Filippseyjum sem stóð í einkavæðingarferli. Hún svarar því ekki heldur hvers vegna engin umræða fór fram í borgarráði eða borgarstjórn um þetta stórmál í aðdraganda þessarar ákvörðunar. Vissulega fóru fram umræður í stjórn REI um málið en ekkert samkomulag eða samningar lágu fyrir, hvorki í stjórn REI né OR, um kaup á hlutabréfum fyrir 12,5 milljarða íslenskra króna í filippeyska orkufyrirtækinu. Sigrún er því að segja ósatt. Ef þessi fyrirhuguðu kaup, sem stjórn Orkuveitunnar samþykkti á fundi sínum þann 3. nóvember 2007, hefðu gengið eftir væri REI/Orkuveitan í dag búin að tapa mörgum milljörðum íslenskra króna á fyrirhuguðum viðskiptum miðað við lántöku, gengi krónunnar og núverandi hlutabréfagengi orkufyrirtækisins á Filippseyjum.

3. Sigrún Elsa er vinsamlegast beðin um að rökstyðja sinn málflutning en ekki reyna að snúa út úr með rangfærslum. Henni er enn fremur bent á að leita frekari upplýsinga hjá fyrrverandi oddvita VG í borgarstjórn, Svandísi Svavarsdóttur, um þetta mál en fulltrúar borgarstjórnarflokka VG og Samfylkingar í stjórn OR samþykktu að gengið yrði til þessara kaupa. Greinilegt er að bæði Sigrún Elsa og Svandís vildu stuðla að einkavæðingarferli ríkisrekins orkufyrirtækis á Filippseyjum þótt a.m.k. Svandís hafi allt aðra skoðun á slíkum málum hvað Ísland varðar. Og að lokum, Sigrún, hvers vegna svarar þú því ekki hvort þetta mál hafi verið rætt eða samþykkt í borgarráði eða í borgarstjórn? Í REI-skýrslunni svokölluðu sem Svandís ritstýrði var m.a. lögð sérstök áhersla á „að öll stærri verkefni og viðfangsefni [skyldu] þola opna og gagnrýna umræðu".

Höfundur er forseti borgarstjórnar.