Leikstjóri Transformers svarar yfirlýsingum Megan Fox

Michael Bay, leikstjóri Transformers kvikmyndanna hefur svarað Megan Fox sem hefur sakað hann um að hugsa meira um tæknibrellur en leikhæfileika í myndum sínum.

Það var Michael sem veitti Megan Fox hlutverk í myndunum árið 2007 og svo í framhaldsmyndinni sem var frumsýnd í síðasta mánuði. „Hún segir fullt af fáránlegum hlutum því hún er bara 23 ára og á eftir að þroskast mikið. Þú ranghvolfir augunum þegar þú heyrir slíkar yfirlýsingar og hugsar: „Allt í lagi Megan, þú getur gert hvað sem þú vilt, við náum því."

Þá segir Michael að sér finnist Megan mega sýna meira þakklæti til mannsins sem kom henni á kortið. „Enginn í heiminum vissi hver Megan Fox var fyrr en ég setti hana í Transformers."