Telur ekki að Sjálfstæðisflokkurinn verði fyrir skaða til langs tíma

Geir H. Haarde forsætisráðherra telur ekki að Sjálfstæðisflokkurinn verði fyrir skaða, sé til langs tíma litið, þótt gremja fólks bitni að einhverju leyti á flokknum um stund. Nokkuð hefur verið um úrsagnir úr flokknum sem rekja má til aðgerða stjórnvalda í bankakreppunni.

Sjálfstæðisflokkurinn hefur sætt mikilli gagnrýni að undanförnu, en formaður flokksins segir að það muni ekki koma í ljós fyrr en í næstu kosningum hvort flokkurinn hafi skaðast - spyrja skuli að leikslokum í þeim efnum.

Um 50 þúsund félagar eru í Sjálfstæðisflokknum og virðist nokkur hreyfing á félagatalinu allan ársins hring, menn ýmist að skrá sig í eða úr flokknum. Þó er áberandi að úrsögnum fjölgar þegar öll spjót standa á flokknum, líkt og nú í efnagsþrengingunum.