Segir ráðherrum Samfylkingarinnar éttann sjálfur

Sigmundur Ernir Rúnarsson stjórnandi þáttarins Mannamál er lítt hrifinn af ráðherrum Samfylkingarinnar þessa daga. Sendir hann þeim tóninn á bloggi sínu og segir þeim að "éttan sjálfur" að sið Steingríms J.

"Ráðherrar Samfylkingarinnar kjósa þögnina þessa dagana. Fréttaviðtalsþættir Stöðvar 2 hafa reynt að fá Össur Skarphéinsson í viðtal í fimm vikur … án árangurs," bloggar Sigmundur Ernir.

"Reynt hefur verið við Jóhönnu Sigurðardóttur í þrjár vikur … án árangurs. Sömuleiðis Þórunni Sveinbjarnadóttur. Mannamál hefur staðið Ingibjörgu Sólrúnu opið í fimm vikur … án árangurs - og ekki einu sinni hefur borist svar frá aðstoðarmanni. Sömuleiðis hefur Björgvin G. Sigurðsson neitað komu í Mannamál í álíka tíma.

Þetta er fólkið sem þráfaldlega segist þurfa að upplýsa þjóðina betur.

Ég segi eins og Steingrímur Joð: Éttann sjálfur …"