Lottomatica Roma steinlá í Barcelona

Barcelona vann í kvöld stórsigur á Lottomatica Roma í Meistaradeild Evrópu í körfubolta, 86-57.

Rómverjar skoruðu ekki nema 25 stig í öllum fyrri hálfleik og náðu mest að skora sautján stig í einum fjórðungi - þeim síðasta. Staðan í hálfleik var 41-25 fyrir Barcelona og sigurinn því afar öruggur.

Jón Arnór Stefánsson lék í fimmtán mínútur í liði Lottomatica í kvöld en náði ekki að skora. Hann tók tvö skot bæði innan og utan þriggja stiga línunnar en náði ekki að nýta þau. Hann tók þar að auki fjögur fráköst, gaf eina stoðsendingu og stal einum bolta.

Lottomatica er nú á botni G-riðils með einn sigur úr þremur leikjum.