Jón Arnór spilaði með Roma á ný

Jón Arnór Stefánsson spilaði með Lottomatica Roma á nýjan leik í kvöld eftir að hafa verið frá síðustu vikur vegna meiðsla.

Hann skoraði tíu stig er Roma tapaði fyrir Chorale Roanne í lokaumferð riðlakeppni Meistaradeildar Evrópu, 74-67. Lottomatica var búið að tryggja sér sæti í 16-liða úrslitum keppninnar fyrir leik kvöldsins.

Hann lék í 25 mínútur í leiknum, skoraði úr tveimur af þremur skotum sínum innan teigs en misnotaði allar fimm þriggja stiga tilraunir sínar. Hann skoraði hins vegar úr öllum sex vítunum sínum. Hann gaf þar að auki tvær stoðsendingar.

Chorale var með fimm stiga forystu í hálfleik, 35-30, og lét forystuna aldrei af hendi.