Bréf drottningamannsins til Díönu miskunnarlaus

Philip drottningamaður skrifaði miskunnarlaus og niðurlægjandi bréf til Diönu prinsessu þar sem hann gagnrýndi siðsemi hennar og lífstíl. Simone Simmons vinkona Díönu bar vitni um þetta við réttarhöldin á dauða Díönu í dag. Hún sagði að prinsessan hefði sýnt sér tvö bréf frá hertoganum af Edinborg frá 1994 eða 1995.

Simmons kynntist Díönu árið 1993 og hélt vinskap við hana til dauðadags Díönu þótt stundum hafi slest upp á vinskapinn. Simmons sem er meðferðarsérfræðingur sagði að eitt bréfið hafi verið handskrifað, en hitt vélritað og Díana hafi lesið bréfin upphátt fyrir hana.

„Hún var fokreið og hermdi eftir röddu hertogans og sagði að lokum „þvílík ósvífni,"" sagði Simmons. Hún sagðist hafa geymt fjölda gagna frá prinsessunni undir rúmdýnu sinni. Þau hafi innihaldið upplýsingar um jarðsprengjur en Díana var ötull talsmaður gegn vopnum. Simmons sagðist hafa óttast líf sitt eftir dauða Díönu og brennt pappírana.

Handskrifuð bréf Díönu til Philips árið 1992 hafa áður verið lögð fram fyrir réttinn. Þá ávarpaði hún hann sem "Kæri pabbi" og lofaði skilning hans og háttvísi.

Rannsóknin á dauða Díönu og Dodi Al Fayed hófst aftur í dag eftir tveggja vikna hlé. Réttarhöldin eru nú hálfnuð en reiknað er með að þau standi yfir í sex mánuði. Fjöldi þekktra einstaklinga á enn eftir að gefa vitnisburð.

Kviðdómur sem skipaður er sex konum og fimm körlum hefur skoðað ýmis gögn í málinu. Meðal annars myndir úr örygismyndavélum Ritz hótelsins í París þar sem parið borðaði áður en það lagði af stað í hina örlagaríku bílferð. Margir þeirra sem voru við vinnu á hótelinu um kvöldið hafa verið yfirheyrðir, meðal annars barþjónn sem sá ökumanninn Henri Paul drekka á barnum um kvöldið. Þá hefur fjöldi annarra vitna stigið í vitnastúku.

Réttarhöldin hafa fram að þessu snúist að mestu um samband Díönu og Dodi. Allir vinir hennar segja að parið hafi verið ánægt og náið, en að Díana hafi ekki sagt að hún hafi ætlað að trúlofast Dodi.

Mohamed Al Fayed faðir Dodi og eigandi Harrods heldur því staðfastlega fram að þau hafi verið myrt eftir fyrirskipun frá konungsfjölskyldunni sem hafi ekki getað hugsað sér að móðir tilvonandi konungs væri gift araba. Hann heldur því ennfremur fram að Díana hafi borið barn Dodi undir belti. Við krufningu kom hins vegar ekkert í ljós sem benti til að hún væri barnshafandi.

Nú verður sjónum kviðdómenda beint að öryggi en á vitnalista þessa viku eru ýmsir sérfræðingar í öryggismálum.