Við erum ekki ofbeldismenn

„Fazmo er eitthvað sem er ekki til í dag. Það er með öllu ólýðanlegt og óþolandi að verið sé að bendla mig og Hallgrím ítrekað við eitthvað sem við komum ekki nálægt," segir Ingvar Þór Gylfason gjarnan kenndur við hina svokölluðu Fazmoklíku.

Fréttablaðið greindi frá því í morgun að hið svokallað Fazmo gengi hefði staðið að baki árásinni á landsliðsmanninn Hannes Þ Sigurðsson í miðbænum um jólin. En Hannes fór mjög illa í árásinni og þarf að vera frá keppni í um sex vikur.

Ingvar Þór er orðinn nokkuð pirraður á að vera settur undir ofbeldishattinn og segir Fazmo hafa verið viðurnefni á ákveðinn vinahóp sem var í Réttarholtsskóla á sínum tíma. „Ég þekkti einhverja tvo úr þessum vinahópi en þetta er ekki til í dag," segir Ingvar og tekur fram að hann hafi verið heima hjá sér með konu og barn þegar umrædd árás átti sér stað.

Ingvar rekur fyrirtækið pose.is með Hallgrími Andra Ingvarssyni félaga sínum sem hann segir ekki heldur hafa komið nálægt umræddri árás. „Auðvitað eru alltaf einhverjir svartir sauðir í kringum mann. Og þó að einhverjir gamlir félagar séu að gera einhverja hluti á maður ekki að þurfa að líða fyrir það."

Ingvar segir að rekstur fyrirtækis þeirra félaga gangi vel og hann sé einnig að klára háskólanám. „Ég veit ekki betur en að við höfum barist manna mest gegn ofbeldi undanfarin þrjú ár. Við ákváðum að fara ekki þessa leið í lífinu og því er óþolandi að maður sé bendlaður við svona ofbeldi."

Ingvar segist frá hroll þegar hann heyrir orðið Fazmo en viðurkennir að hann hafi gert mistök í svokallaðri Hverfisbarsárás á sínum tíma. „Við neituðum heldur ekki fyrir það en höfum breytt okkar lífi til hins betra síðan þá."

Ingvar segist ekki vita hvað gerðist nákvæmlega þegar ráðist var á Hannes í miðbænum en vill koma því á framfæri að hvorki hann né Hallgrímur Andri hafi komið þar nálægt. „Ég vil bara heinsa mig og Hallgrím af þessari árás. Þetta er ekki okkar mál."