Þingflokksformaður segir forystu Seðlabankans rúna trausti

Lúðvík Bergvinsson þingflokksformaður Samfylkingarinnar segir að forysta Seðlabanka Íslands sé rúin trausti. „Staðreyndin er sú að traust ríkir ekki," segir Lúðvík.

Þetta kom fram í máli þingflokksformannsins í viðtali við Heimi og Kollu í þættinum „Í bítið" á Bylgjunni í morgun.

Þar ræddi Lúðvík m.a. um þau mistök sem Seðlabankinn gerði í vor þegar hann fór ekki strax í stóra erlenda lántöku eftir að alþingi hafði veitt heimild til þess. Lúðvík segir að þetta aðgerðaleysi þá þýði að nú verðum við að taka erlent lán á mun verri kjörum.

Þá kom það Lúðvík verulega á óvart að Seðlabankinn hefði öfugt við aðra seðlabanka þrengt að möguleikum viðskiptabankana til þess að taka lán. Þetta hafi verið gert með því að breyta þeim reglum sem giltu í sumar.